امراض الثاليريا

الثياليريا دى هى المرض الخفى اللى ممكن ماتتعرفش عليه الا بعد يومين تلاته ..واحتمال ماتعرفهاش الا بعد ماتموت الحالة كمان ..
عارف ليه ؟؟!!
انا اقلك ليه لان الثيليريا للاسف بتتشابه فى البداية مع امراض كتييير ...لانه باختصار اول واهم عرض هو ارتفاع الحرارة 41 فيما فوق مع خمول وقطع الاكل وطبعا حاجات كتير بتعمل كده زى البابيزيا والثلاثية والقلاعية وغيرها ... طب تعرف ازاى انها ثيليريا هو ده المهم .

1- الحمى 41 فى الثيليريا بتطلع وتنزل يعنى تروح للحالة تدى العلاج تلاقى الحراة نزلت والحالة اكلت ... تانى يوم الاونر يتصل بيك يقلك قطعت الاكل تانى تروح تلاقى الحرارة طلعت تانى ...اول لما تلاقى الحرارة بتطلع وتنزل اعرف ان دى ثيليريا " طبعا لو فى الجمال يبقى تريبانوسوما "...طبعا الوضع ده ممكن يقعد يومين تلاتة ..بعد كده بتظهر باقى الاعراض اللى هى ايه ....؟؟

2- دموع من العين واحمرار واحيانا عماص ده فى اول الحالة .. طبعا فى الاخر العين بتبيض وبيحصل عتامة وعمى ودى باد بروجنوزيس لانها لو مامتتش من الثيليريا هاتموت من عدم الاكل وصعوبة الحياة

3- اللمف نود بتبدا تورم طبعا ممكن تبقى ظاهرة وممكن ورم على خفيف ممكن تلاقى الاتنين اللى قدام البرى سكابيلار او الاربعه مع بعض برى سكابيلار وبرى فيملار وارمين ...احيانا ممكن مع الغدد الوارمة تلاقى ورم تحت الفك او بين الرجلين وان كان مش منتشر لكن ممكن تلاقيه

4- سماع صوت القلب فى الكرش فى الفلانك وده معناه ان الطحال اتضخم خلاص ومش قادر يجدد الدم وده مؤشر سيئ

5- بهتان فى الميوكس ميمبيران فى العين والفلفا وممكن اصفرار وده مؤشر مش كويس

6- نهجان وافرازات من الانف وده معناه اوديما على الرئة وربنا يعوض عليك

7- اسهال مدمم اسود ودى النهاية للاسف وغالبا هايموت

- هى دى الاعراض بالتدريج ..طبعا الحرارة هى العرض الرئيسى والباقى بيظهر فى الاخر ..الاعراض 1 و 2 و3 بيبقى الاسراع بالتشخيص والعلاج بيدى نتايج كويسة ...الاعراض 4 و 5 و6 دى بتبقى انت ونصيبك ممكن اه وممكن لا .. العرض 7 الدم فى الفيسيس دى غالبا تتر النهاية

*** طيب العلاج ... اول حاجة مية على الراس بس لمدة ربع ساعة عشان تبرد الجسم وماتحطش ميه على الضلوع او الضهر لانها هاتكح وتنهج

*** بص ياسيدى فى الاصناف البلدى لانها متعودة وعندها مناعة كويسة .. الاميسين ط.م 1 سم لكل 10 كيلو يوم ورا يوم مع ديكلوفين 3 ايام مع ارزينال 1 سم لكل 20 كيلو بحد اقصى 20 سم 3 ايام هايأدى الغرض وهاتخف ان شاء الله ..ولو عصلجت يبقى بيوتالكس تانى او تالت يوم هايخلص الليلة

*** الاصناف الاجنبية للاسف بتتاثر اكتر خصوصا لو من بلاد باردة .. ودى يفضل انك تدى العلاج العادى اول يوم الاميسين ديكلوفين ارزينال ... وتانى يوم لما الحرارة تنزل تدى بيوتالكس ... على فكرة شغل البيوتالكس فى الحرارة المنخفضة اقولى وافيد ... لانه بيعمل لود على الحيوان لو الحرارة عالية وعن تجربة

*** الجاموس المصرى بيتحمل ومش محتاج بيوتالكس بيخف من غيره مع العلاج العادى ... وابرز الاعراض فيه الحرارة ودموع العين ..الغدد مش بتبان اوى لكن ممكن تورم عادى ... وطبعا لو عصلجت ادى بيوتالكس

*** الاغنام والماعز اهم علامة فيها احمرار العيون والعماص مع الحرارة 41 ودى لازم الاميسين وديكلوفين وارزينال ولو جالك تانى يوم ادى بيوتالكس لان الحرارة بتطول فيهم وبتقرفك وبيقطعو الاكل

*** طبعا فى بدايل للبيوتالكس جيدة وبنص السعر زى البيوتاكيل بتاع شركة كيلا ممتاز عن تجربة

***لازم تنضف الحيوانات والمكان من القراد الناعم لانه هو اللى بينقل الثيليرا وخللى بالك قرادة واحدة ممكن تنقل الثيليريا عكس البابيزيا بتحتاج عدد من القراد ..استخدم بيوتكس "دلتا مثرين" سبح الحيوانات ورش المكان

ملحوظة كل الاعراض المذكورة رايتها بام عينى ماحدش قالى عليها يعنى كلام فيلد فيلد ..طبعا وعملنا تحاليل دم كتير واتاكدنا انها ثيليريا